Xabier Mendiguren Bereziartuk, Euskararen Gizarte Erakundeen Kontseilua sortu zenetik Idazkari Nagusi izan denak, erretiroa hartuko du aurten. Bere ordez, Kontseiluko zuzendaritzak hala erabakita, Paul Bilbao izango da idazkari nagusi berria. Kontseiluko zuzendaritza-taldeak hartutako erabakia apirilaren 24an berretsi beharko dute bazkideek. Hartara, egun horretatik aurrera Paul Bilbaok hartuko du Xabier Mendigurenen ardura.

Kontseiluak osatutako Euskarians, Euskal kirolarien argazki-bilduma osatu ahal izateko azken aukera izango da egun hauetan.  Urrian hasi eta urtarrilaren 20ra bitarte eskuratu ahal izango dira kromoak Euskal Herriko kioskoetan. 138 argazkiz osatutako bilduma ikastetxeetan doan banatu eta kromoak 2.000 kioskotan egon dira salgai hilabeteotan.

Eusko Ikaskuntzak, Euskaltzaindiak eta Kontseiluak Euskal Telebista Nafarroan ikusten jarraitzeko kanpaina bultzatuko dute. Iruñean egindako prentsaurrekoan Eusko Ikaskuntzako Jose Mari Velez de Mendizabal, Euskaltzaindiko Andres Iñigo, Kontseiluko Xabier Mendiguren eta Acció Cultural del País Valencià-ko Toni Gisbertek ‘Mugarik gabeko telebista' kanpaina aurkeztu dute.

Kontseiluak eta Malerrekako Mankomunitateak eta Euskalgintzak eskualdean euskararen normalizazioa modu partehartzailean bizkortzeko Euskaraz bai dinamika abian jarri dute aurtengo udazkenean. Urrian, azaroan eta abenduan zehar egindako gogoeta saioen eta girotze lanen borobiltzea izan da larunbatean Doneztebeko zineman egindako aurkezpen ekitaldi soziala. Eta ekitaldiaren ezaugarri nagusia, abian jarri berri den dinamika honena bezalaxe, partehartzea eta elkarlana izan dela esan dezakegu, eskualdeko hainbat kultur eta folklore taldek beren ekarpentxoa egin nahi izan baitute ekitaldirako ikuskizunak eskainiz. Eguerdia ederki gozatu zuten bertaratu ziren herritarrek, baita ordezkari politiko zein elkarte eta abarretako ordezkariek ere.